சிறுவனுக்காய்

தானிய காவல் சிறுவன் 

உண்டிகோலால் 

விரட்டிய பறவைகள் 

பக்கத்து மரம் அமர்ந்து..

கொத்திப்போட்டன

கனிகளை..

சிறுவனுக்காய்.

கொலை

தன்னை பெற்றதால்

தாய் வேண்டும்..!

உடன் பிறந்ததால்

தமக்கை வேண்டும்..!

மகிழ்ந்து உறவாட 

மனைவி வேண்டும்..!

வேண்டுதல் நிறைவேற 

வேண்டும் அம்மனும்..!

தாய் முதல் சாமிவரை 

பெண்ணாய் வேண்டும்..,

பெற்ற குழந்தை மட்டும் 

பெண்ணாய்போனால் 

முதல் பால் 

கள்ளிப்பால்..!

குட்டி நிலாக்கள்(ஹைக்கூ)

வானவில் உதிர்த்த 

வண்ண வண்ண பூக்கள் 

வண்ணத்துப் பூச்சிகள்

               *******

தற்கொலைக்கு முயன்றால் 

கிணற்றுக்குள் எனக்கு முன் 

நீயுமா நிலாவே..?

               ********

வியர்த்தது விட்டில் பூச்சி

மரண பயமல்ல..,

மானுட பயம்.

              *********

தலை கனக்க 

பூ வைத்திருக்கிறாள் விதவை ,

பூக்கூடையில்.

              *********

கடவுள் கையில் 

ஆயுதம்,

பயம் யாரிடம்.?

              ********

வயல்காட்டிலும் நாகரீகம் 

பேண்ட் சட்டையுடன் 

சோளக்கொல்லை பொம்மை.

               ********

வெயிலில் ஆடு மேய்த்து

புழுங்கிய சிறுவனுக்கு ,

குடைபிடித்தது பனை.

               *********

மண்ணில் வீழ்ந்தால் 

மாயும் உருவென்று,

தும்பை மேல் தூங்கும் பனி.

                **********

விண்ணுக்கும் ம்ண்ணுக்கும் 

காதல் தூது,

மழை.

                 **********

தொலைந்து போனேன் 

தேடி வந்தது,

வானத்து நிலா.

                 *********